GLP-1 dorilarini qabul qilayotganlar qo‘shimchalarga ko‘proq murojaat qilmoqda — shifokorlar ehtiyotkorlikka chaqirmoqda

GLP-1 dorilarini qabul qilayotganlar qo‘shimchalarga ko‘proq murojaat qilmoqda — shifokorlar ehtiyotkorlikka chaqirmoqda

Ozish va 2-toifa diabetni davolashda qo‘llaniladigan GLP-1 preparatlari tobora ommalashib bormoqda.

GLP-1 — organizmda ishtahani va qondagi glyukoza miqdorini boshqarishda ishtirok etadigan gormon. Ushbu gormon ta’sirini takrorlovchi dorilar odamning tezroq to‘yishiga, kamroq ovqat iste’mol qilishiga va qondagi qand miqdorini nazorat qilishga yordam beradi.

GLP-1 guruhiga semaglutid asosidagi Ozempic, Wegovy va Rybelsus, liraglutid asosidagi Saxenda va Victoza, shuningdek Trulicity kabi preparatlar kiradi. Mounjaro va Zepbound esa GLP-1 bilan bir qatorda GIP retseptoriga ham ta’sir qiluvchi preparatlar bo‘lib, amaliyotda ko‘pincha ushbu dorilar bilan bir guruhda tilga olinadi.

Ayrim foydalanuvchilarda bu preparatlar fonida ko‘ngil aynishi, ich qotishi, holsizlik va boshqa noqulayliklar kuzatilgani sababli ular turli vitamin va oziq-ovqat qo‘shimchalarini qabul qilishga murojaat qilmoqda.

Reuters ma’lumotiga ko‘ra, GLP-1 foydalanuvchilarining deyarli yarmi ushbu dorilarni qabul qilishni boshlagandan keyin yangi vitamin yoki qo‘shimchalarni ham qo‘shgan. Eng ommaboplari — oqsil, kletchatka, kollagen, elektrolitlar, probiotiklar, magniy va B12 vitamini.

Boston Consulting Group tadqiqotiga ko‘ra, GLP-1 foydalanuvchilari oqsil, kletchatka va kollagenga avvalgidan taxminan 20% ko‘proq mablag‘ sarflamoqda.

Shifokorlar va regulatorlar esa ehtiyotkorlikka chaqirmoqda. AQShda ko‘plab oziq-ovqat qo‘shimchalari dori vositalari kabi FDA tomonidan bozorga chiqishidan oldin tasdiqlanmaydi. Shu sababli ularning tarkibi, dozasi va kutilayotgan foydasi bo‘yicha dalillar har doim ham yetarli bo‘lmasligi mumkin.

Ijtimoiy tarmoqlardagi influencerlar ham bunday mahsulotlar savdosiga katta ta’sir ko‘rsatmoqda. Mutaxassislar, ayniqsa GLP-1 preparatlarini qabul qilayotgan bemorlarga, yangi qo‘shimchalarni boshlashdan oldin shifokor yoki farmatsevt bilan maslahatlashishni tavsiya qilmoqda.