Portfolio

“Pharm Service” davlat muassasasi tomonidan mahalliy farmatsevtika ishlab chiqaruvchilari uchun Yangtze River Pharmaceutical Group korxonasiga biznes tashrif tashkil etildi. Tashrifdan asosiy maqsad mahalliy ishlab chiqaruvchilarga xalqaro tajribani o‘rganish, zamonaviy farmatsevtika ishlab chiqarish jarayonlari bilan yaqindan tanishish hamda yangi hamkorlik aloqalarini yo‘lga qo‘yishda ko‘maklashishdan iborat bo‘ldi.

Biznes tashrif davomida ishtirokchilar Yangtze River Pharmaceutical Group kompaniyasining ishlab chiqarish infratuzilmasi, texnologik jarayonlari, sifat nazorati tizimi, innovatsion yechimlari va xalqaro bozorlarda faoliyat yuritish tajribasi bilan tanishdilar.

Shuningdek, uchrashuvlarda texnologiya transferi, xomashyo ta’minoti, qo‘shma loyihalar, eksport imkoniyatlari va mahalliy korxonalar bilan uzoq muddatli hamkorlikni rivojlantirish masalalari muhokama qilindi.

“Pharm Service” DM tomonidan tashkil etilgan ushbu tashrif mahalliy farmatsevtika ishlab chiqaruvchilarining xalqaro tajribasini oshirish, yangi biznes aloqalarni shakllantirish va O‘zbekiston farmatsevtika sanoatining raqobatbardoshligini kuchaytirishga xizmat qiladi.